Kuri uyu wa gatanu tariki ya 25 Mata, 2025 Umunyamabanga Mukuru w’Urwego rw’Ubugenzacyaha (RIB) Col. Pacifique Kabanda yibukije uruhare rukomeye abayobora amashami atandukanye muri RIB bafite mu mitangire ya serivise, abasaba gukomeza kunoza imikorere n’imikoranire bya kinyamwuga kugirango RIB ikomeze kuzuza inshingano zayo neza.

Umunyamabanga Mukuru wa RIB ibi yabigarutseho mu nama ya mbere yaguye akoranye n’abayobozi b’amashami atandukanye muri RIB n’abayihagarariye ku rwego rw’Intara, kuva aho aherewe inshingano zo kuyobora uru rwego.

Muri iyi nama, Umunyamabanga Mukuru yashimangiye indagagaciro n’imyitwarire bigomba kuranga umukozi wa RIB nk’inkingi ikomeye izatuma urwego rukomeza gushimwa no kwizerwa n’abaturarwanda, binatanga ishusho nziza ku gihugu muri rusange.

Yagize ati: “Hari ibikorwa tutagomba kwihanganira nk’abagezacyaha, kuko ntakuntu umunyabyaha yakurikirana undi munyabyaha. Tugomba kwitwararika cyane kuko dufite inshingano zidasanzwe.”

Umunyamabanga Mukuru yakomeje anasobanura icyerekezo Umukuru w’Igihugu afite mu kurinda umutekano w’abatuye mu gihugu n’iby’abo agaragaza uruhare n’inshingano bya RIB muri iki cyerekezo kigamije guha umuturage agaciro no kumuhoza ku isonga muri serivise zose RIB itanga.

Yagize ati: “RIB imaze kuba inkingi ikomeye mu mutekano w’Igihugu cyacu, ntabwo nshidikanya ku ruhare dufite mu mutekano kuko iyo umuturage azi  ko ari mu gihugu kigendera ku mategeko, aba atekanye. Igihe twese ibi tubyumva, bituma tunasobanukirwa tukanumva neza uburemere bw’akazi dukora.”  

Muri iyi nama kandi hanabaye kurebera hamwe ubuzima rusange bw’Urwego rw’Ubugezacyaha n’abakozi barukorera, imbogamizi zihari mu kazi ka buri munsi, no kungurana ibitekerezo by’uburyo bwo guteza imbere imikorere n’imikoranire hagamijwe gukomeza guha abaturarwanda serivise zinoze kandi zihuse.