Umuyobozi ushinzwe ubushakashatsi no gukumira ibyaha, akaba n’umuvugizi wa RIB Dr. Murangira B. Thierry yasabye abanyeshuri n’abarimu bo mu ishuri rya Lycée de Kigali gukomeza guharanira ubumwe bw’abanyarwanda kuko ari yo nkingi ikomeye igihugu cyacu cyubakiyeho no kwirinda ibyaha by’ingengabitekerezo ya Jenoside n’ibifitanye isano nayo kuko bibangamira ubwo bumwe.

Ibi umuvugizi wa RIB akaba yabigarutseho mu kiganiro yahaye abanyeshuri n’abarezi ba Lycée de Kigali mu gikorwa cyo kwibuka ku nshuro ya 31 Jenoside yakorewe Abatutsi cyateguwe n’iri shuri kuri uyu wa gatanu tariki ya 09 Gicurasi, 2025.

Ikigo cya Lycée de Kigali cyahoze ari icy’abana b’abayobozi. Mu gihe cya jenoside kikaba cyari kirinzwe cyane bikaba byaratumye nta mututsi washoboraga kugihungiramo nubwo hari mu gihe cy’ibiruhuko by’amashuri. Amateka agaragaza ahubwo ko icyumba mberabyombi cya Lycée de Kigali haberaga inama z’ibitero no gukora amalisiti y’abatutsi bagombaga kwicwa. 

Mu kiganiro cye cyibanze ku itegeko ryerekeranye n’icyaha cy’ingengabitekerezo ya jenoside n'ibyaha bifitanye isano nayo, umuvugizi wa RIB akaba ari nawe wari umushyitsi mukuru muri iki gikorwa, yibukije abanyeshuri n’abarezi ko kwibuka atari ukubika inzika ahubwo bidufasha kumenya amateka kandi bikaduha umukoro wo kurwanya no gukumira ihakana n’ipfobya rya jenoside.

Dr Murangira yanagaraje ingaruka mbi ibi byaha bigira ku wabikoze ndetse n’uwabikorewe asaba abanyeshuri ba Lycée de Kigali ubufatanye mu gukomeza guhangana n’abashaka kugarura amacakubiri mu banyarwanda cyane cyane abifashisha imbuga nkoranyambaga.  Yanatanze umukoro ku barimu n’abarezi wo gukomeza kwihugura ku mateka y’igihugu cyacu kugirango bataba intandaro yo kuyobya abo barera.

Kwibuka bikaba byatangijwe n’urugendo ndetse no gucana urumuri rw’icyizere. Ibiganiro, ubuhamya ndetse n’ubutumwa bunyuze mu mivugo n’ikinamico byose byagarutse ku mateka yaranze igihugu n’ubutwari bw’ingabo zari iza RPA-Inkotanyi mu guhagarika jenoside.