Mu rwego rwo kongera ubushobozi mu ikoreshwa ry’ikoranabuhanga rigezweho mu kugenza ibyaha, mu mwaka wa 2023 Urwego rw’Igihugu rw’Ubugenzacyaha (RIB) rwatangiye gukoresha utudege tutagira abapilote tuzwi nka drone.

Izi drone zaje ziyongera ku rindi koranabuhanga RIB yifashisha mu nshingano zayo zo gukumira, gutahura no kugenza ibyaha. RIB ikaba inafite gahunda yo kwagura ishami ry’abagenzacyaha bakoresha drone ndetse no gukomeza kubahugura muri iri koranabuhanga.

Dore uburyo izi drone zifasha RIB mu nshingano zayo;

Kugera ahakorewe icyaha cyangwa ahakorerwa ibyaha bigoye kugera mu buryo busanzwe

Izi drone zigera kure hamwe na hamwe umugenzacyaha adashobora kugera byihuse bitewe n’imiterere yaho. Aha twavuga nko mu misozi miremire ihanamye, ahabereye ibiza, hejuru y’imigezi cyangwa inyanja, mu ishyamba ry’izintane n’ahandi.

Gufata no gukusanya ibimenyetso mu mafoto n’amashusho y’ahakorewe cyangwa ahakorerwa ibyaha

Drone zoherezwa ahakorewe icyaha zigafata amashusho n’amafoto byerekana ingano, umuzenguruko n’ubugari bwaho icyaha cyakorewe. Ibi bifasha abagenzacyaha kumenya imbibi zahakekwa kuba haboneka ibimenyetso no gushakisha cyangwa ibyakoreshejwe mu gukora ibyaha. Ibi bikaba byifashishwa mu gukora iperereza.

Nko ku byaha bikorerwa ibidukikije, amafoto n’amashusho yafashwe na drone yerekana ibipimo byahangijwe n’ingaruka z’ibi byaha zihagaragara, byifashishwa nk’ibimenyetso mu gihe cyo gutuganya dosiye kuri ibi byaha.

Gushakisha no gutahura abakekwaho ibyaha

Ikoranabuhanga rya drone ryifashishwa cyane mu kumenya abakekwaho ibyaha hifashishijwe amafoto cyangwa amashusho aba yafashwe. Ibi biterwa n’ubushobozi bw’izi drone mu kugenzura ahantu hanini kandi mu gihe gito no gukurura amasura n’imiterere y’abantu baba bari muri ibyo bikorwa.

Aha twavuga nk’abantu bacukura amabuye y’agaciro mu buryo butemewe aho izi drone zoherezwa mu birombe aho bacukura zigafata amasura yababikora kugirango bafatwe bashyikirizwe ubutabera.

Ubukangurambaga mu baturage bwo kurwanya ibyaha

Mu byo izi drone zikoreshwa na RIB, harimo no koherezwa mu duce dutandukanye zitanga ubutumwa ku byaha runaka n’uburyo bwo kubyirinda. Ibi bikorwa mu buryo bw’amajwi ahantu haba hateraniye abantu benshi kandi bari muri gahunda zabo zitandukanye.

Kurinda abagezacyaha bari mu kazi ahantu hagaragaye umutekano muke

Mu bikorwa byo kugenza ibyaha ahantu haba hakekwa umutekano muke, abagenzacyaha babanza kohereza izi drone kugirango zibahe amakuru yuko byifashe. Ibi bifasha abagezancyaha gutegura uburyo bahagera bitewe n’amakuru baba babonye kugirango bakora akazi kabo mu mutekano hirindwa ingaruka zirimo no gutakaza ubuzima.

Muri rusange, ikoranabuhanga ry’utudege twa drone ni uburyo bukomeje gufasha mu kugenza ibyaha mu buryo bwihuse kandi bunafite umutekano wizewe. Ubushobozi bwazo mu kugera ahantu bigoye kugera no gutanga amakuru y’ingenzi cyangwa gukusanya ibimenyetso mu gihe gito, byihutisha imitangire y’ubutabera, gufata ibyemezo bishingiye kuri ayo makuru ndetse no gukora ubukangurambaga ku byaha bitandukanye mu buryo bwegerejwe abaturage.