Tariki ya 04 Ukwakira 2024 i Kigali hateraniye inama rusange ya gatanu y’Urwego rw’Ubugenzacyaha (RIB) iyobowe n’umunyamabanga Mukuru w’Urwego rw’Ubugenzacyaha Jeannot Ruhunga, ari kumwe n’Umunyamabanga Mukuru Wungirije, Kamarampaka Consolee.

Iyi nama ngarukamwaka ihuza ubuyobozi bukuru bwa RIB n’abagenzacyaha bahagarariye abandi mu gihugu hose. Iy'uyu mwaka wa 2024 ikaba yari ifite insanganyamatsiko igira iti “Gukora kinyamwuga, mu mucyo hifashishijwe ikoranabuhanga.”

Mu ijambo rye afungura iyi nama ku mugaragaro, Umunyamabanga Mukuru yerekanye ko uko ikoranabuhanga ritera imbere ari nako abakora ibyaha barikoresha mu gushyira imigambi mibi yabo mu bikorwa bityo n’abagenzacyaha bakwiye kuba barikoresha ndetse kurusha aba banyabyaha mu guhangana nibyo byaha.

Yagize ati:”Ikoranabuhanga rigenda ritera imbere kandi ninako abakora ibyaha baryifashisha bakora ibyaha mu buryo bigoye kubitahura mu buryo bworoshye. Iyo rero abagizi ba nabi bakoresheje ikoranabuhanga kugirango bakore ibyaha natwe nk'abashinzwe kubikumira, gutahura ababikora no kubakurikirana dukwiye kurushaho gukoresha iryo koranabuhanga kugirango tugere kuri izo nshingano.”

Umunyamabanga Mukuru yasabye abagenzacyaha gukomeza kwihugura mu bijyanye n’ikoranabuhanga rigezweho, kugira imyitwarire ikwiye barushaho kunoza serivisi baha ababagana.

Kuri ubu, ibyangombwa bitangwa na RIB bisabwa n’umubare munini w'abaturarwanda biboneka ku rubuga rw'Irembo. Muri ibi harimo Icyemezo cy'ubudakemwa mu mico no myitwarire (Certificate of Good Conduct), Icyemezo kimenyekanisha ibyabuze cyangwa ibyibwe (Loss/Theft Certifcate), Icyemezo cyo kohereza umurambo w'uwapfuye mu mahanga (Clearance to Transport a deceased person's body abroad), n’Icyemezo cy'iperereza ry'ibyaha (Criminal Investigation Clearance Certificate).

Mu rwego rw’ikoranabuhanga kandi mu mwaka ushyize wa 2023, RIB yatangiye gukoresha “drone” mu guhangana n’ibyaha byibasira ibidukikije n’ibindi.

Muri iyi nama rusange kandi abagezacyaha banagize umwanya wo kuganira ku byagezweho, imbogamizi bahuye nazo no gufatira hamwe ingamba nshya kugirango barusheho kuzuza neza inshingano z’urwego.

Iyi nama rusange yasojwe ku mugaragaro na Ministiri w’Ubutabera akaba n’Intumwa Nkuru ya Leta Dr. Emmanuel Ugirashebuja. Mu ijambo rye, yashimiye urwego ko rutegura umwanya wo kuganira no kungurana ibitekerezo ku mikorere y’ubugenzacyaha kuko bitanga ikizere ko hari ibigiye gukemuka.

Ministiri w’Ubutabera yanashimiye RIB ku ntambwe imaze guterwa mu ikoreshwa ry’ikoranabuhanga, haba muri serivisi zayo ndetse no mu guhangana n’ibyaha. Yibukije abagenzacyaha kubahiriza amahame y’akazi bakora no kwanga umugayo kuko aribyo bituma abaturage bakomeza kugirira ikizere inzego z'ubutabera mu Rwanda, by'umwirariko ubugenzacyaha.

Yagize ati: “Nzi ko kubahiriza amahame yo kwanga umugayo ari umusingi w’akazi kanyu muri rusange natwe twese ariko muri rwa runana rw’ubutabera, mwebwe nk’urwego rw’ubugenzacyaha serivisi nyinshi niho zitangirira, ubwo muba mumeze nk’indorerwamo y’ubutabera mu Rwanda. Ni mwe mutanga ikizere ko nahandi hose bigera bizagenda neza.”

Iyi nama rusange ije ikurikira iya kane yabaye tariki ya 15 Kamena 2023.