Urwego rw’Ubugenzacyaha (RIB) rwasabye abagororwa bagiye kurangiza ibihano by’ibyaha bahamijwe ku ruhare bagize muri Jenoside yakorewe Abatutsi mu 1994 kuzafatanya nabo bazasanga mu kubaka igihugu barwanya ingengabiterekerezo ya jenoside n’ibyaha bifitanye isano nayo.

Mu kiganiro n’abagororwa basigaje igihe gito ngo barangize ibihano bagera kuri 644 bagize icyiciro cya 8 cya gahunda y’amahugurwa abagenerwa, Umuyobozi mu ishami rishinzwe ubushakashatsi no kurwanya ibyaha muri RIB Mwenedata Philbert yabagaragarije imiterere y’ingengabitekerezo ya jenoside, ibyaha bihungabanya umudendezo w’abaturage, uko bikurikiranwa n’uburyo bwo kubyirinda.  

Muri rusange, iyi gahunda y’amahugurwa igamije kubasobanurira umurongo igihugu cyiyemeje mu iterambere, imiyoborere, n’imibanire myiza n’uruhare rwabo mu gutuma bigerwaho, kongera kuba abanyarwanda bakunda igihugu cyabo, babumbatira ubumwe n’ubudaheranwa bw’abanyarwanda ndetse no kubafasha kwitegura kuzabana neza n’abaturanyi babo, imiryango yabo n’abo basize bakoreye ibyaha.

Byumwihariko, Mwenedata Philbert yasobanuriye aba bagororwa ibyaha bishamikiye ku ngengabitekerezo ya jenoside, uburyo byigaragaza muri iki gihe, ingaruka zabyo ku muryango nyarwanda n’amategeko abihana.

Mu kiganiro cye, yanakomoje ku bindi byaha by’inzaduka akenshi bigendana n’iterambere mu ikoranabuhanga benshi basize bitabaho harimo uburiganya bukoreshejwe ikoranabuhanga, icuruzwa ry’abantu ndetse n’icyaha cyo gusambanya abana, abasaba nabyo kuzabyirinda no gutanga amakuru aho bazabibona.

Icyiciro cya munani cy’aya mahugurwa abera mu Igororero rya Nyamasheke cyatangiye ku itariki ya 18 Gicurasi, bikaba biteganyijwe ko  azarangira tariki ya 12 Kamena uyu mwaka.

Iyi gahunda y’ibiganiro ku bagiye kurangiza ibihano itegurwa na Minisiteri y’Ubumwe bw’Abanyarwanda n’Inshingano Mboneragihugu (MINUBUMWE) ifatanyije n’Urwego rw'Igihugu rushinzwe Igorora (RCS) n’izindi nzego.